विराटनगर —आन्द्रे रसेलको अलराउन्ड प्रदर्शनमा कोलकाता नाइटराइडर्सले शनिबार आईपीएल २०२४ मा सनराइजर्स हैदराबादमाथि रोमाञ्चक चार रनको जित निकालेको छ । हर्षित रानाले अन्तिम ओभरमा बहादुरीपूर्ण बलिङ गरेपछि कोलकाताको जित निश्चित भएको हो ।
जितका लागि हैदराबादलाई अन्तिम ओभरमा १३ रन चाहिएकोमा हेनरिच क्लासेनले रानाको पहिलो बलमै छक्का प्रहार गरे । तर त्यसपछि तीन बलको अन्तरमा रानाले क्लासेन र साहबाज अहमदलाई आउट गरे ।
अन्तिम बलमा चार रन चाहिएकोमा कप्तानी गरिरहेका प्याट कमिन्सले कुनै रन जोड्न सकेनन् र कोलकाताले जितको खुसीयाली मनाएको थियो । पहिले ब्याटिङ गरेको कोलकाताले ७ विकेटको क्षतिमा २०८ रन बनाएका थियो ।
त्यसमा ‘प्लेयर अफ द म्याच’ आन्द्रे रसेलले २५ बलमा ६४ रन बनाए । जवाफमा हैदराबादले सात विकेट गुमाउँदै २०४ रन मात्रै बनाउन सक्यो । हैदराबादका लागि भने क्लासेनले २९ बलमा ६३ रन जोडे ।
