विराटनगरमा फुटपाथ अतिक्रमणविरुद्ध कडाइ, वैशाख ११ देखि विशेष अभियान
विराटनगर । विराटनगर महानगरपालिका ले बजार क्षेत्रको अव्यवस्थित फुटपाथ अतिक्रमण अन्त्य गर्न विशेष अभियान सञ्चालन गर्ने भएको छ। सरोकारवाला निकायसँगको समन्वय बैठकले वैशाख ११ गतेदेखि मुख्य बजार तथा आसपासका क्षेत्रमा कडाइका साथ फुटपाथ व्यवस्थापन लागू गर्ने निर्णय गरेको हो।
मेयर नागेश कोइराला को उपस्थितिमा सम्पन्न बैठकले प्रारम्भिक चरणमा दुई दिन माइकिङमार्फत व्यवसायी र सर्वसाधारणलाई सचेत गराउने तथा त्यसपछि पूर्ण रूपमा कार्यान्वयनमा जाने रणनीति तय गरेको छ। महानगरले सडकपेटीमा भइरहेको अव्यवस्थित व्यापार, सटरबाहिर सामग्री राख्ने प्रवृत्ति र ट्राफिक अवरोधलाई लक्षित गर्दै नियम कडाइ गर्ने जनाएको छ।
नगर प्रहरी प्रमुख राजन पौडेल का अनुसार अबदेखि पसलको सटर बाहिर कुनै पनि सामग्री राख्न पाइने छैन। निर्माण सामग्री सडकपेटीमा थुपार्न नपाइने, मोटरसाइकल ग्यारेजका सामान बाहिर राख्न निषेध गरिने तथा कवाडी व्यवसाय सञ्चालनका लागि न्यूनतम मापदण्ड अनिवार्य रूपमा पालना गर्नुपर्नेछ। नियम उल्लंघन गर्नेविरुद्ध कारबाही प्रक्रिया समेत अघि बढाइनेछ।
फुटपाथ व्यवस्थापनसँगै ट्राफिक चाप न्यूनीकरण र व्यवस्थित पार्किङको दीर्घकालीन समाधान खोज्न महानगरले सरसफाई शाखाका प्रमुख पुनमकुमार दाहाल को संयोजकत्वमा समिति गठन गरेको छ। समितिमा जिल्ला ट्राफिक प्रहरी कार्यालयका प्रमुख सन्तोष न्यौपाने, मोरङ उद्योग व्यापार संघका वरिष्ठ उपाध्यक्ष अनिल साह, खुद्रा व्यापार संघ विराटनगरका अध्यक्ष सञ्जयकुमारसिंह मण्डल सदस्य तथा नगर प्रहरी प्रमुख राजन पौडेल सदस्यसचिव रहेका छन्।
समितिले ठेला व्यवस्थापन, पार्किङ क्षेत्र निर्धारण र ट्राफिक प्रवाह सुधारसम्बन्धी सुझावसहित १५ दिनभित्र प्रतिवेदन पेश गर्नेछ। प्रतिवेदनका आधारमा महानगरले चरणबद्ध रूपमा सुधारका कार्यक्रम लागू गर्ने योजना बनाएको छ।
मेयर नागेश कोइरालाका अनुसार पछिल्लो समय सर्वसाधारणबाट फुटपाथ अतिक्रमण, जाम समस्या र असुरक्षित आवतजावतबारे व्यापक गुनासो आएको थियो। त्यसैलाई सम्बोधन गर्न अभियानलाई प्राथमिकताका साथ अघि बढाइएको उनले बताए। व्यवस्थित, सफा र सुरक्षित सहर निर्माणका लागि निजी क्षेत्र, व्यवसायी र नागरिक सबैको सहकार्य आवश्यक रहेको उनले उल्लेख गर्दै अभियानमा साथ दिन आग्रह गरेका छन्।
मोरङका निमित्त प्रमुख जिल्ला अधिकारी सरोज कोइराला ले महानगरको अभियानमा प्रशासनको पूर्ण साथ रहने प्रतिबद्धता जनाए। त्यसैगरी, मोरङ प्रहरी प्रमुख एसपी कवित कटवाल ले बजार क्षेत्रको फुटपाथ नियन्त्रण र सिंघिया तथा केशलिया खोलामा भइरहेको अवैध उत्खनन रोक्न प्रहरीको तर्फबाट पूर्ण सहयोग रहने स्पष्ट पारे।
मेयर नागेश कोइरालाको अध्यक्षतामा भएको बैठकमा प्रमुख प्रशासकीय अधिकृत योगेन्द्रप्रसाद दुलाल, वडा नं. ९ का वडाध्यक्ष विश्वनाथप्रसाद भगत, सशस्त्र प्रहरीका एसपी गेहेन्द्रबहादुर भण्डारी लगायत विभिन्न संघ–संस्थाका प्रतिनिधिहरूको उपस्थिति रहेको थियो।