विराट ट्रेड एक्स्पो–२०८२ को सम्पूर्ण तयारी पूरा
सबै १४० भन्दा बढी स्टल बुकिङ हाउसफुल, चार देशको सहभागिता
विराटनगर — मोरङ उद्योग व्यापार संघको आयोजनामा विराटनगरमा सञ्चालन हुन लागेको विराट ट्रेड एक्स्पो–२०८२ को सम्पूर्ण तयारी पूरा भएको छ। संघका सचिव तथा विराट ट्रेड एक्स्पोका संयोजक अमित सारडाले एक्स्पोका लागि निर्माण गरिएका सबै १४० भन्दा बढी स्टलको बुकिङ हाउसफुल भइसकेको जानकारी दिएका छन्।
संघले आगामी २०८२ साल पुस ९ गतेदेखि १९ गतेसम्म विराटनगर महानगरपालिका वडा नम्बर–१ स्थित मोरङ जिल्ला प्रहरी कार्यालयको दक्षिणतर्फ रहेको खाली जग्गामा विराट ट्रेड एक्स्पो आयोजना गर्न लागेको हो।
यस वर्षको एक्स्पोमा नेपाल, भारत, बंगलादेश र पाकिस्तान गरी चार देशका उद्योग तथा व्यापारिक प्रतिष्ठानको सहभागिता रहनेछ। तीमध्ये विदेशी मुलुकका मात्रै ३५ वटा स्टल रहेका छन् र ती सबैको बुकिङसमेत सम्पन्न भइसकेको संयोजक सारडाले बताए।
३ डोम, २०० स्टलको संरचना
एक्स्पो स्थलमा ३ वटा ठूला डोम निर्माण गरिएको छ, जहाँ करिब २०० स्टल व्यवस्थापन गरिएको छ। तीमध्ये १८ वटा अटोमोबाइल्स स्टल र १६ वटा फुड स्टल छुट्टै डोम तथा संरचनामा राखिएको छ। स्वदेशी तथा विदेशी उद्योगबाट उत्पादित वस्तु तथा सेवाहरू एक्स्पोका मुख्य आकर्षण रहने संघको भनाइ छ।
ओपेरा हाउस डिस्प्ले र जलपरी–माछा एक्वेरियम आकर्षण
दर्शक तथा उपभोक्तालाई थप आकर्षित गर्न एक्स्पो स्थलमा अस्ट्रेलियाको सिड्नीमा अवस्थित विश्वप्रसिद्ध ओपेरा हाउसको नमुना (डिस्प्ले) निर्माण गरिएको छ। उक्त संरचनालाई आगन्तुकहरूले सेल्फी जोनका रूपमा प्रयोग गर्न सक्नेछन्।
त्यसैगरी, एक्स्पो स्थलमा जलपरी र विभिन्न प्रजातिका माछासहितको एक्वेरियम निर्माण गरिएको छ। एक्स्पो अवलोकन गर्न आउने उपभोक्ताले जलपरी तथा माछाको एक्वेरियम नजिकबाट अवलोकन गर्न पाउनेछन्।
टिकट दर, समय र विद्यार्थीलाई निःशुल्क प्रवेश
विराट ट्रेड एक्स्पो अवलोकनका लागि प्रति व्यक्ति १५० रुपैयाँ टिकट दर कायम गरिएको छ। एक्स्पो बिहान १० बजेदेखि राति ८ बजेसम्म सञ्चालनमा रहनेछ।
यद्यपि, स्कुल पोसाकमा आएका विद्यालय तथा कलेजका विद्यार्थीलाई बिहान १० बजेदेखि दिउँसो १:३० बजेसम्म प्रवेश शुल्क नलाग्ने व्यवस्था गरिएको आयोजकले जनाएको छ।
सांस्कृतिक कार्यक्रममार्फत मनोरञ्जन
एक्स्पो अवधिभर दर्शक तथा उपभोक्तालाई मनोरञ्जन प्रदान गर्न राष्ट्रिय तथा स्थानीय कलाकारहरूको सहभागितामा विविध सांस्कृतिक कार्यक्रम प्रस्तुत गरिने जनाइएको छ। व्यापार, उद्योग प्रवर्द्धनसँगै सांस्कृतिक आदान–प्रदान र आन्तरिक पर्यटन प्रवर्द्धनमा समेत एक्स्पोले योगदान पुर्‍याउने अपेक्षा आयोजकको छ।
मोरङ उद्योग व्यापार संघले विराट ट्रेड एक्स्पो–२०८२ लाई प्रदेशकै ठूलो औद्योगिक तथा व्यापारिक प्रदर्शनीको रूपमा स्थापित गर्ने लक्ष्य लिएको जनाएको छ।