• ५८औं श्री राधाकृष्ण रथयात्रा विराटनगरमा भव्य रुपमा सम्पन्न, नयाँ रथको पहिलो प्रदर्शन

विराटनगर – श्रीकृष्ण जन्माष्टमीको भोलिपल्ट परम्परागत रूपमा निकालिने ऐतिहासिक श्री राधाकृष्ण रथयात्रा यस वर्ष विराटनगरमा अत्यन्तै भव्य रूपमा सम्पन्न भएको छ। ५८ वर्षपछि नयाँ रथ निर्माण भएको यस अवसरलाई विशेष उत्सवका रूपमा मनाइएको हो।

1. श्री राधाकृष्ण मन्दिर समितिले करिब ४५ लाख रुपैयाँभन्दा बढी खर्च गरेर नयाँ रथ निर्माण गरेको हो। नेपाल र भारतका करिब ५ लाखभन्दा बढी भक्तजन आइतबार विराटनगरमा जम्मा भई रथयात्रामा सहभागी भएका थिए। भक्तजनलाई स्वागत गर्न विराटनगरवासीले खाना, नास्ता, खिर, पुरी, जेरी, तरकारी, मिठाई, लस्सी, जुस, सर्वत, पानी तथा चिया–कफीसम्मको व्यवस्था गरेका थिए।

पानी ट्याङ्कीस्थित श्री राधाकृष्ण मन्दिरदेखि तय गरिएको ९ किलोमिटर लामो रथयात्रा मार्गमा ३ सयभन्दा बढी संघसंस्था, उद्योगी–व्यापारी र सर्वसाधारणले स्टल राखी भक्तजनलाई स्वागत गरेका थिए।

यस अवसरमा कोशी प्रदेशका मुख्यमन्त्री हिक्मतकुमार कार्कीको पहलमा नेपाली सेनाको हेलिकप्टरमार्फत भक्तजनमाथि पुष्पवृष्टि गरिएको थियो।

सामुदायिक प्रहरीको सक्रियता

सामुदायिक प्रहरी सेवा केन्द्र विराटनगर–२ तीनपैनीले ठूलो स्टलमार्फत भक्तजनलाई जुस, पानी, चक्लेट वितरण गर्नुका साथै स्वास्थ्य शिविर र रेडक्रससँग समन्वय गरेर एम्बुलेन्सको व्यवस्था समेत गरेको थियो।
कार्यक्रममा अध्यक्ष मिना जोशी, उपाध्यक्ष (पूर्वप्रहरी उपरीक्षक) बिधानन्द माझी, सचिव भोजराज घिमिरे, कोषाध्यक्ष सन्तोष बाहेती, कानुनी सल्लाहकार शुनिल कर्ण, पदेन सदस्य प्रहरी हल्दार तुलसा खड्का र सहायक हल्दार कल्पना कटेल, कार्यसमिति सदस्य पद्मा पौडेल, शेरसिंह दुगड, बिजय शर्मा, सुशील मुन्द्रा लगायतले उल्लेखनीय भूमिका निर्वाह गरेका थिए।
अध्यक्ष मिना जोशीले संस्थाले सुरक्षा, सहयोग र चेतनामूलक कार्यक्रमलाई निरन्तरता दिने प्रतिवद्धता जनाइन्।

भक्तजनलाई प्रसाद वितरण

भक्तजनलाई प्रसाद वितरण गर्ने परम्परा यस वर्ष पनि जारी राखियो। पवन सुराना, अशोक सुराना र अरुण सुरानाले आफ्नै घर अगाडि स्टल राखेर हजारौँ भक्तजनलाई जुस, पानी, चक्लेट वितरण गरे। त्यस्तै, लायन्स क्लब अफ विराटनगरले पनि सामूहिक रूपमा भक्तजनलाई स्वागत गरेको थियो।

नयाँ रथको विशेषता

नयाँ रथ प्यागोडा शैलीमा निर्माण गरिएको छ, जसको उचाइ २१ फिट, लम्बाइ १९ फिट र चौडाइ १४ फिट छ। यसअघि २०२५ सालमा बनेको पुरानो रथ ५७ वर्षसम्म प्रयोगमा आएको थियो। नयाँ रथ कम्तीमा ५० वर्षसम्म टिक्ने गरी निर्माण गरिएको विराटनगर महानगरपालिकाका मेयर नागेश कोइरालाले जानकारी दिए। महानगरले रथ निर्माणका लागि करिब ४४ लाख रुपैयाँ बराबरको सहयोग गरेको थियो।

1. शुभारम्भ तथा ऐतिहासिक महत्त्व

५८औं श्री राधाकृष्ण रथयात्राको औपचारिक शुभारम्भ मुख्यमन्त्री हिक्मतकुमार कार्की, मेयर नागेश कोइराला र आयोजक समितिका अध्यक्ष कैलाश रेग्मीले संयुक्त रूपमा गरेका थिए।
मुख्यमन्त्री कार्कीले रथयात्रालाई “नेपालकै नभई एसियाकै दोस्रो ठूलो धार्मिक उत्सव” को रूपमा उल्लेख गर्दै यसले सामाजिक एकता र समृद्धिको सन्देश दिएको बताए।

विराटनगरमा सम्पन्न यो रथयात्रा धार्मिक, सांस्कृतिक र सामाजिक दृष्टिले ऐतिहासिक बन्न पुगेको छ।