रेडस्टारद्वारा कक्षा १२ मा उत्कृष्ट जीपीए ल्याउने विद्यार्थी सम्मानित
पथरी शनिश्चरे, साउन २३
राष्ट्रिय परीक्षा बोर्डद्वारा भर्खरै प्रकाशित कक्षा १२ को नतिजामा उच्च जीपीए ल्याउँदै ‘नेपाल टप’ गरेको दाबी गर्ने मोरङको पथरीशनिश्चरे–२ स्थित रेडस्टार अंग्रेजी आवासीय माध्यमिक विद्यालयले उत्कृष्ट विद्यार्थीलाई सम्मान तथा नगद पुरस्कार प्रदान गरेको छ।
व्यवस्थापन समूहमा अध्ययनरत चन्दन साह र प्रविण कट्टेलले समान ३.९६ जीपीए ल्याएर विद्यालयको इतिहासमै उत्कृष्ट परिणाम हासिल गरेका छन्। विद्यालयले यसलाई ‘नेपाल टप’ भएको दाबी गर्दै दुवै जनालाई पथरीशनिश्चरे नगर प्रमुख मोहनप्रसाद तुम्वापोको हातबाट जनही ५० हजार रुपैयाँका दरले पुरस्कृत गरेको हो।
त्यस्तै, समान ३.९२ जीपीए ल्याउने विद्यार्थी मनिषा पोखरेल र प्रमिस रिजाललाई जनही २० हजार रुपैयाँका दरले सम्मान गरिएको विद्यालयका प्रिन्सिपल टी.एन. तिम्सिनाले जानकारी दिनुभयो। उनीहरूद्वारा प्राप्त अंक पनि नगरकै उच्च भएको विद्यालयको भनाइ छ।
कार्यक्रममा नगर प्रमुख तुम्वापोले विद्यालय र विद्यार्थीको उत्कृष्ट प्रदर्शनले पथरीशनिश्चरे नगरको प्रतिष्ठा बढाएको उल्लेख गर्दै निरन्तर शैक्षिक उत्कृष्टतामा योगदान दिन आग्रह गर्नुभयो।
३.९६ जीपीए ल्याएका चन्दन साहले आफ्नो सफलता विद्यालय, अभिभावक र व्यक्तिगत मेहनतको संयुक्त फल भएको बताए। त्यस्तै, प्रविण कट्टेलले रेडस्टारलाई शैक्षिक हबको रूपमा स्थापित गर्न पाएको योगदानमा गर्व व्यक्त गरे।
२०७९ सालको वैशाखमा सम्पन्न कक्षा १२ को परीक्षामा रेडस्टारबाट २७० जना विद्यार्थी सहभागी भएकोमा ३.६० भन्दा माथि जीपीए ल्याउने २९ जना, ३.२० भन्दा माथि ल्याउने १२७ जना रहेका छन्। विद्यालयको यस वर्षको नतिजा ९७.०४ प्रतिशत रहेको छ, जुन पथरीशनिश्चरे नगरकै उच्च हो।
गत वर्षको एसईई परीक्षामा रेडस्टारका अजय लिम्बू र सतिष आचार्यले जीपीए–४ ल्याएका थिए। त्यस्तै, सोही परिसरमा रहेको ऋतम्भरा बहुमुखी क्याम्पसबाट बीबीएस परीक्षा दिएकी कृतिका भट्टराईले ७६.८० प्रतिशत अंकसहित उतिर्ण भएकी थिइन्। हाल विद्यालयमा एक हजार छ सय विद्यार्थी अध्ययनरत छन
