बुढीगंगा गाउँपालिकाले फुटबल टिम बनाउने , 

Logo
भोजराज घिमिरे शनिबार, भाद्र १४, २०८२

बुढीगंगा गाउँपालिकाले फुटबल टिम बनाउने

मोरङ,
मोरङको बुढीगंगा गाउँपालिकाले फुटबल टिम तयार गर्ने भएको छ। गाउँपालिकाको तर्फबाट विभिन्न प्रतियोगितामा सहभागिता जनाउने उद्देश्यसहित टिम निर्माण प्रक्रिया अघि बढाइएको हो।

गाउँपालिकाका अध्यक्ष जितनारायण थापा मगरका अनुसार युवा पुस्ताको व्यक्तित्व विकास गर्ने र उनीहरूलाई कुलतबाट टाढा राख्ने उद्देश्यले फुटबल टिम गठन गर्न लागिएको हो। उहाँले खेलाडीलाई निरन्तर अभ्यासका लागि कोच तथा डाइटको व्यवस्था समेत गाउँपालिकाले नै गर्ने जानकारी दिनुभयो। “८ वर्षदेखि विभिन्न उमेर समूहलाई समेटेर क्लब बनाएर प्रशिक्षण सुरु गर्ने तयारी गरेका छौं,” अध्यक्ष थापा मगरले बताउनुभयो।

यसै क्रममा गाउँ युवा परिषद्ले गत असार १३ देखि २१ गतेसम्म आयोजना गरेको वडा स्तरीय फुटबल प्रतियोगिताबाट ३२ खेलाडी छनोट गरी गाउँपालिकालाई हस्तान्तरण गरिएको छ। प्रारम्भिक चरणमा सहभागी २ सय खेलाडीमध्ये छनोट गरिएका उत्कृष्ट ३२ खेलाडीलाई आज औपचारिक रूपमा हस्तान्तरण गरिएको परिषद्का अध्यक्ष पुजेश कोइरालाले जानकारी दिनुभयो। उहाँका अनुसार अखिल नेपाल फुटबल संघ (एन्फा) को नियमअनुसार छनोट प्रक्रिया सम्पन्न गरिएको हो।

गाउँपालिकाको १२ लाख रुपैयाँ सहयोगमा आयोजित उक्त प्रतियोगितामा ७ वटा वडा र १३ वटा माविबाट प्रतिनिधित्व गर्ने गरी ८ टिम सहभागी भएका थिए। “प्रतिभा पहिचान गरी उत्कृष्ट खेलाडी छनोट गर्ने नै हाम्रो उद्देश्य हो,” अध्यक्ष कोइरालाले भन्नुभयो।

“तिन युग तिन नेतृत्व : विगत र वर्तमान स्थानीय नेतृत्वको सम्मान” भन्ने मूल नारासहित सम्पन्न अन्तर–वडा स्तरीय प्रतियोगिताको समापन कार्यक्रममा प्रगति प्रतिवेदन, आय–व्यय विवरण तथा पालिका स्तरीय फुटबल टिमका लागि छनोट गरिएका खेलाडीहरूको नामावली सार्वजनिक गरिएको थियो।

आयोजक समितिले यस गतिविधिबाट युवा खेलाडीको क्षमता उजागर हुने र उनीहरूलाई ठूलो स्तरका प्रतियोगितामा सहभागी हुन बाटो खुल्ने विश्वास व्यक्त गरेको छ।

तपाईको प्रतिक्रिया
RED FM

हाम्रो टिम

छिटै आउदै छ

सम्पर्क

Red FM 101 MHz
Biratnagar Morang Nepal
E-mail: [email protected]
Web: www.redfm.com.np
Facebook: fb.com/redfm.com.np
Phone: 9825378356