नेपाल प्रहरीको ३२औँ महानिरीक्षकमा चन्द्रकुवेर खापुङ

काठमाडौं । नेपाल प्रहरीको ३२औँ महानिरीक्षक (आईजीपी) पदमा एआईजी चन्द्रकुवेर खापुङ नियुक्त भएका छन्।

तीन दशक लामो सेवायात्रामा खापुङले अपराध अनुसन्धानदेखि प्रदेश कमान्डसम्मका चुनौतीपूर्ण जिम्मेवारी इमान, निष्पक्षता र सफा छविसहित पूरा गरेका छन्। उनको नेतृत्वशैली पारदर्शिता, अनुशासन र जनविश्वासप्रति केन्द्रित रहँदै आएको छ।

प्रहरी सेवामा प्रवेश गरेदेखि नै उनले विभिन्न महत्त्वपूर्ण जिम्मेवारी सम्हालेका छन्। अपराध अनुसन्धान, जिल्ला र प्रदेशस्तरको कमान्डमा रहँदा उनी सजग, इमानदार र व्यावसायिक प्रहरी अधिकृतका रूपमा चिनिए। सहकर्मी र अधीनस्थ दुवैबीच उनी अनुकरणीय र प्रेरणादायी नाम मानिन्छन्।

खापुङको कार्यकाल छोटो छ (२०८२ कात्तिक २६ मा समाप्त हुने) । तर, यस अवधिमा समेत उनले प्रहरी संगठनलाई अनुशासित, पारदर्शी र जनमुखी बनाउन महत्त्वपूर्ण पहल गर्ने विश्वास गरिएको छ। प्रहरी सेवामा छोटो तर प्रभावशाली अध्याय लेखिने अपेक्षा गरिएको छ।

चन्द्रकुवेर खापुङको जन्म तेह्रथुम जिल्लामा भएको हो। साधारण परिवारमा जन्मिएका उनले कडा परिश्रम, शैक्षिक लगनशीलता र सेवाप्रतिको समर्पणका आधारमा प्रहरी सेवामा स्थापित स्थान बनाएका छन्। शिक्षित र शान्त स्वभावका कारण पनि उनी संगठनभित्र सम्मानित व्यक्तित्व मानिन्छन्।

नेपाल प्रहरीलाई जनताको सुरक्षाप्रति अझ जिम्मेवार, पारदर्शी र अनुशासित बनाउन खापुङको नेतृत्व महत्वपूर्ण मोड सावित हुने अपेक्षा गरिएको छ। छोटो अवधि भए पनि उनको कार्यकाल संगठनका लागि प्रेरणादायी बन्ने देखिन्छ।