कोशी प्रदेश आमसञ्चार विधेयकविरुद्ध पत्रकारहरूको विरोध प्रदर्शन
विराटनगर/ – कोशी प्रदेश सरकारले ल्याएको आमसञ्चार विधेयक मा रहेका प्रेस स्वतन्त्रता विरोधी प्रावधान खारेज गर्न माग गर्दै प्रदेशभर पत्रकारहरूले विरोध प्रदर्शन गरेका छन्।
नेपाल पत्रकार महासंघ कोशी प्रदेश समिति, मोरङ शाखा तथा विभिन्न पत्रकार संगठनहरूको संयुक्त अगुवाइमा बिहीबार (भदौ १२) विराटनगरको मुख्यमन्त्री कार्यालयअगाडिबाट जुलुस निकालिएको थियो। सो जुलुस रोडशेष चोक पुगेर धर्नामा परिणत भएको हो। पत्रकारहरूले ‘प्रेस स्वतन्त्रता कायम गर’, ‘काला प्रावधान खारेज गर’ जस्ता नारा लगाएका थिए।
विरोधसभा सम्वोधन गर्दै महासंघ कोशी प्रदेश समितिका अध्यक्ष भरत खड्काले प्रेस सामग्री प्रकाशन/प्रसारणमा नियन्त्रण गर्ने र पत्रकारलाई सञ्चार प्रतिष्ठानका रजिस्ट्रारमार्फत दण्ड–जरिवाना गर्ने प्रावधान अस्वीकार्य रहेको बताए। ‘‘हामीले पहिले नै सुझाव पेस गरेका थियौँ, तर सरकारले ती मागलाई बेवास्ता गरेर विधेयक अघि बढाएको छ,’’ उनले भने।
यसअघि बुधबार (भदौ ११) महासंघले प्रदेशसभा सदस्यहरूलाई विधेयक संशोधनको मागसहित एसएमएस पठाएको थियो। महासंघले विधेयक सच्याउन दबाब दिने उद्देश्यले चरणबद्ध आन्दोलन घोषणा गरिसकेको छ।
त्यसैगरी सङ्खुवासभामा पनि नेपाल पत्रकार महासंघको आयोजनामा जिल्ला प्रशासन कार्यालय अगाडि धर्ना कार्यक्रम गरिएको छ। सहभागीहरूले ‘प्रेस स्वतन्त्रता जिन्दाबाद’, ‘स्वतन्त्रता विरोधी प्रावधान खारेज गर’ जस्ता नाराबाजी गरेका थिए।
झापामा भने कोशी प्रदेश आमसञ्चार विधेयकमा रहेका प्रेस स्वतन्त्रता विरोधी प्रावधान खारेज गर्न माग गर्दै जिल्ला प्रशासन कार्यालय अगाडि पत्रकारहरूले धर्ना दिएका छन्।
