विराट मेडिकल कलेज टिचिङ हस्पिटलमा २ सय शैय्याको स्त्री तथा प्रसूति भवन सञ्चालन
मोरङ, । बिराटनगर ,मोरङको बुढीगंगा गाउँपालिका–२, टंकिसिनवारीस्थित विराट मेडिकल कलेज टिचिङ हस्पिटलले स्त्री तथा प्रसूति सेवाका लागि समर्पित २ सय शैय्याको अत्याधुनिक भवन मंगलबारदेखि सञ्चालनमा ल्याएको छ।
महिला स्वास्थ्य सेवामा विशिष्टीकरण र आधुनिकता थप गर्ने उद्देश्यले निर्माण गरिएको भवनको उद्घाटन काठमाडौं विश्वविद्यालयका उपकुलपति प्रा.डा. अच्युत प्रसाद वाग्लेले गरेका हुन्।
नव–निर्मित भवनमा ५ वटा अत्याधुनिक शल्यक्रिया कक्ष, ३० बेडको डिलक्स क्याबिन, छुट्टै गाइनो आइसीयू लगायतका सुविधा छन्। यसले कोशी प्रदेशसहित पूर्वी नेपालका महिलाहरूका लागि सुरक्षित र गुणस्तरीय स्वास्थ्य सेवामा पहुँच बढाउने अपेक्षा गरिएको छ।
अस्पतालका अध्यक्ष डा. ज्ञानेन्द्र बहादुर कार्कीले स्त्री तथा प्रसूति जस्तो संवेदनशील क्षेत्रमा समर्पित भवनसहितको सेवा विस्तारले उपचार अझ प्रभावकारी र व्यवस्थित हुने विश्वास व्यक्त गरे। अस्पतालसँग अब २४ वटा शल्यक्रिया कक्ष सञ्चालनमा आएका छन्।
प्रमुख अतिथि प्रा.डा. वाग्लेले विराट मेडिकल कलेजले स्वास्थ्य सेवा र चिकित्सा शिक्षामा उदाहरणीय काम गर्दै आएको उल्लेख गर्दै आगामी दिनमा पनि गुणस्तर कायम राख्दै अघि बढ्ने विश्वास व्यक्त गरे। कार्यक्रममा उनले विदेश पढ्न जाने नेपाली विद्यार्थीका कारण वार्षिक ८ खर्बभन्दा बढी रकम बाहिरिने गरेको दाबी गर्दै नेपालमै गुणस्तरीय शिक्षाको विकास गर्नुपर्नेमा जोड दिए।
सो अवसरमा अस्पतालका चिकित्सक, नर्स र विद्यार्थीहरूका लागि विशेष अभिमुखीकरण कार्यक्रम पनि गरिएको थियो। कार्यक्रममा बोल्दै डा. कार्कीले सरकारले हालै बढाएको एमबीबीएस कोटालाई ‘१० वर्षपछिको आइस ब्रेक’ भन्दै स्वागत गरे।
अस्पतालले बिरामीका आफन्त, चिकित्सक र कर्मचारीहरूलाई सुविधा पुग्ने गरी आधुनिक ‘विराट खाजा घर’ पनि सञ्चालनमा ल्याएको छ।कार्यक्रममा काठमाडौं विश्वविद्यालयका चिकित्सा शास्त्र संकायका डीन प्रा.डा. मनोज हुमागाईं, कलेजका प्राचार्य डा. सन्तोष उपाध्याय काफ्ले लगायतले शुभकामना मन्तव्य दिएका थिए। साथै सहायक प्रमुखका रूपमा डा. मनोज भट्टराई र डा. किशोर गुरुङलाई नियुक्तिपत्र प्रदान गरिएको थियो।
