

बुद्धशान्तीमा अखिल नेपाल महिला संघद्वारा तीज विशेष कार्यक्रम, सात जना व्यक्तित्वलाई सम्मान
बुद्धशान्ती (झापा), भदौ ४ ।
अखिल नेपाल महिला संघ, बुद्धशान्ती गाउँ कमिटी झापाले बुद्धशान्ती–२, जयपुरचोकस्थित सामुदायिक भवनमा तीज विशेष कार्यक्रम भव्य रूपमा सम्पन्न गरेको छ।
कार्यक्रममा सन्देशमूलक नाटक, विविध सांस्कृतिक प्रस्तुति र महिलाद्वारा प्रस्तुत आकर्षक नृत्यहरूले उत्सवको माहोल झनै रमाइलो बनेको थियो। “म छम छम” गीतमा प्रस्तुत गरिएको नृत्यले उपस्थितलाई विशेष आकर्षित गरेको थियो।
महिला सशक्तीकरण, समाजमा जागरण र तीज पर्वलाई अझ अर्थपूर्ण बनाउन आयोजना गरिएको यस कार्यक्रममा स्थानीय सरोकारवाला, संघ–संस्था प्रतिनिधि तथा ठूलो संख्यामा महिला दिदीबहिनीहरूको उल्लेख्य उपस्थिति रहेको आयोजकले जनाएको छ।
सो अवसरमा समाजका विभिन्न क्षेत्रमा योगदान पुर्याएका सात जना व्यक्तित्वलाई सम्मान गरिएको थियो। सम्मानित हुनेहरूमा दिपा मिश्र, अटोचालक समिता अर्याल, सिटीचालक सरु कालिकोटे, रिना मल्लिक, रिता मल्लिक (बजार सरसफाइ कर्मी) र अन्तर्राष्ट्रिय स्तरमा गोल्ड मेडल जितेका तेक्वान्डो खेलाडी चन्द्र गौतम रहेका छन्।