

रेडस्टार माविद्वारा कक्षा १२ पास आउट विद्यार्थीलाई सम्मान सहित बधाई तथा शुभकामना
पथरी शनिश्चरे,
मोरङको पथरी शनिश्चरेस्थित रेडस्टार अङ्ग्रेजी माध्यमिक विद्यालयले कक्षा १२ को राष्ट्रिय परीक्षा बोर्ड २०८२ मा उत्कृष्ट नतिजा हासिल गर्ने आफ्ना विद्यार्थीलाई सम्मान सहित बधाई तथा शुभकामना प्रदान गरेको छ।
विद्यालयले आयोजना गरेको विशेष कार्यक्रममा यस शैक्षिक सत्रमा कक्षा १२ मा ३.९६ जिपिए ल्याई नेपाल टप गर्न सफल विद्यार्थीहरूलाई सम्मान गरिएको हो।
विद्यालयका निर्देशक तथा प्रिन्सिपल टी.एन. तिम्सिनाले रेडस्टार विद्यालय विगत ७ वर्षदेखि एक अब्बल शैक्षिक हब को रूपमा स्थापित भइसकेको उल्लेख गर्दै व्यवस्थापनसहित सबै विषय समूहमा उत्कृष्ट नतिजा कायम राख्न सफल भएको बताए।
कार्यक्रमका प्रमुख अतिथि पथरी शनिश्चरे नगरपालिकाका प्रमुख मोहनप्रसाद तुम्बापोले नेपाल स्तरमै ३.९६ र ३.९२ जिपिए ल्याउन सफल चन्दन शाह, प्रवीण कटेल, मनिषा पोखरेल र प्रमिश रिजाललाई रुद्राक्ष माला, अबिर, टीका र मायाको चिनो सहित सम्मान गरे।
सम्मानपछि नगर प्रमुख तुम्बापोले विद्यार्थी, अभिभावक र विद्यालय परिवारको त्रिपक्षीय प्रयासकै कारण यस पटकको उल्लेखनीय सफलता सम्भव भएको बताए। उनले खेलकुद, गीत–संगीत, वक्तृत्वकला लगायत सहशैक्षिक क्रियाकलापमा समेत रेडस्टार विद्यालयले अब्बलता कायम राखेको प्रशंसा गरे।
यस वर्षको कक्षा १२ को परीक्षामा देशभरका ५ लाख १० हजार ९८७ विद्यार्थीलाई उछिन्दै चन्दन शाह र प्रवीण कटेलले व्यवस्थापन समूहमा ३.९६ जिपिए हासिल गरेका थिए। विद्यालयका २६२ जना (९७.०४%) विद्यार्थी ग्रेडेड र ८ जना ननग्रेडेड रहेका छन्। नतिजाअनुसार ३१ जनाले ३.६ भन्दा माथि, १२७ जनाले ३.२ भन्दा माथि, ८९ जनाले २.८ भन्दा माथि र १५ जनाले २.४ भन्दा माथि जिपिए हासिल गरेका छन्।
गत वर्षको एसईई परीक्षामा सतिश आचार्य र अजय लिम्बुले ४ जिपिए हासिल गरी विद्यालयको उत्कृष्ट नतिजामा निरन्तरता दिएको स्मरण गरिएको थियो।
यसअघि नै विद्यालयले नेपाल टपर चन्दन शाह र प्रवीण कटेललाई जनही रु. ५० हजार र मनिषा पोखरेल तथा प्रमिश रिजाललाई जनही रु. २० हजार नगद पुरस्कार प्रदान गरिसकेको थियो।