विराटनगरमा ९४औं श्री राधाकृष्ण रथ यात्रा भव्य रूपमा हुँदै, ५ लाख भक्तजनको सहभागिता अपेक्षित
विराटनगर – ऐतिहासिक र धार्मिक रूपमा अत्यन्तै महत्वपूर्ण मानिने श्री राधाकृष्ण रथ यात्रा विराटनगरमा यस वर्ष पनि भव्य रूपमा सम्पन्न हुने भएको छ। वि.सं. १९८८ मा स्थापना भएको श्री राधाकृष्ण मन्दिरबाट सुरु भएको यो रथ यात्रा यसपटक ९४औं संस्करणमा प्रवेश गर्दैछ।
मन्दिर व्यवस्थापन समितिका अनुसार श्रीकृष्ण जन्माष्टमीको भोलिपल्ट, भदौ १ गते, आइतबार अपराह्न ३:३० बजे रथयात्रा सुरु हुनेछ। नव निर्मित २९ फिट ३ इन्च अग्लो भव्य रथमा श्री राधाकृष्ण आरूढ गराई ८ किलोमिटर लामो यात्रा नगर परिक्रमा गराइनेछ। यात्राको क्रममा रथ ४४ स्थानमा विश्राम गर्नेछ।
एशियाकै दोस्रो ठूलो धार्मिक रथ यात्रा
श्री राधाकृष्णको यो रथ यात्रा नेपालका लागि मात्र होइन, सम्पूर्ण एसिया महादेशका लागि गौरवको विषय बनेको छ। जगन्नाथपुरीपछिको दोस्रो ठूलो रथयात्राको रूपमा चिनिने यो यात्रामा नेपाल तथा भारतका करिब ५ लाख भक्तजनको उपस्थितिको अनुमान गरिएको छ।
पुरुष–महिला बराबरीको रथ तान्ने परम्परा
रथ तान्नका लागि दायाँपट्टि पुरुष भक्तजन र बायाँपट्टि महिला भक्तजनका लागि १६५ फिट लम्बाइका दुईवटा डोरी राखिएको छ। लाठ्ठामा समाई रथ तान्ने यो विशेष परम्परा अत्यन्तै आकर्षक मानिन्छ।
विविधता झल्काउने झाँकी र भजन मण्डली
रथको अगाडि विभिन्न जातजाती, सम्प्रदाय र संस्कृतिका झाँकीहरू प्रदर्शन गरिनेछ। साथमा भजन मण्डलीहरूको ताँती रहनेछ, जसले करिब ३ किलोमिटरको लम्बाइ ओगट्नेछ।
सुरक्षा र व्यवस्थापनमा १००१ सदस्यीय समिति सक्रिय
श्री राधाकृष्ण मन्दिर कार्य समितिका अध्यक्ष कैलाश रेग्मीको अध्यक्षतामा १००१ सदस्यीय मूल समारोह समिति गठन गरिएको छ। साथै, १६ वटा उपसमितिहरू निर्माण गरिई तयारीलाई अन्तिम रुप दिइएको छ।
सरकारी तथा निजी क्षेत्रको सहयोग
रथ यात्रा सफल बनाउन कोशी प्रदेश सरकार, जिल्ला प्रशासन कार्यालय, जिल्ला प्रहरी कार्यालय, प्रदेश प्रहरी, नेपाल विद्युत प्राधिकरण, नेपाल टेलिकम, खानेपानी संस्थान, व्यापारी संघसंस्थाहरूको सहकार्य रहेको छ।
विशेष जानकारीका लागि:
रथ यात्रा हेर्न आउने भक्तजनलाई समयमै मार्ग परिवर्तन र ट्राफिक व्यवस्थापनबारे जानकारी दिइनेछ।
अनलाइनमार्फत प्रत्यक्ष प्रसारणको व्यवस्था पनि गरिने सम्भावना छ।
