सुदूरपश्चिम प्रदेशका विभिन्न भागहरूमा पछिल्ला १ देखि ३ घण्टासम्म मध्यमदेखि भारी वर्षा भएपछि जल तथा मौसम विज्ञान विभाग (DHM) ले मौसम सम्बन्धी सतर्कता जारी गरेको छ।

डोटीको पश्चिम सेती र दिपायल तथा डडेल्धुराको साहुखर्कास्थित वर्षा मापन केन्द्रहरूले उच्च वर्षा मापन गरेका छन्, जसले स्थानीय बासिन्दामा चिन्ता बढाएको छ।

विभागको मौसम पूर्वानुमान महाशाखाले प्रभावित क्षेत्रहरूमा बहने साना खोलानाला तथा नदीहरूमा आकस्मिक बाढीको सम्भावना भएकाले आज दिउँसोसम्म विशेष सतर्क रहन आग्रह गरेको छ। त्यस्तै, ढल्केका र अस्थिर भूबनोट भएको क्षेत्रमा पहिरोको जोखिम पनि उच्च रहेको बताइएको छ।

नवलपरासी पश्चिमको देउराली नवल, चितवनको शक्तिखोर र पाल्पाको बल्द्याङगढी नजिकका खोलानालामा समेत आकस्मिक बाढीको सम्भावना रहेकाले ती स्थानमा विशेष सतर्कता अपनाउन आग्रह गरिएको छ।

हालको मौसम प्रणालीको कारणको रूपमा विभागले पश्चिमी र स्थानीय हावाको मिश्रणसँगै कोशी प्रदेशमा सक्रिय मनसुन प्रणालीलाई देखाएको छ।

बाढीपहिरोको जोखिममा परेका पहाडी तथा तराईका बासिन्दाहरूलाई आवश्यक सतर्कता अपनाउन र सुरक्षित रहन विभागले आग्रह गरेको छ।