विराटनगर, माघ २३ गते । संयुक्त लोकतान्त्रिक मधेसी मोर्चाका नेताहरुले स्थानीय निकाय पुनर्संरचना आयोगले सरकारलाई बुझाएको प्रतिवेदन विराटनगरमा जलाएका छन् । मोर्चाका नेता कार्यकर्ताहरु विराटनगर बजार परिक्रमा गर्दै जलजला मोड अगाडि जम्मा भएर प्रतिवेदन मधेस विरोधी भएको भन्दै जलाएका हुन् ।
जनसंख्याको आधारमा स्थानीय निकाय गठन गरिनु पर्ने आफूहरुको मागलाई वेवास्ता गरी प्रतिवेदन तयार पारिएको हुँदा आफूहरु बाध्य भएर प्रतिवेदन जलाउन सडकमा उत्रिएको सद्भावना पार्टीका केन्द्रिय सदस्य दिलीप धाडेवाले बताउनुभयो । जलजला मोड अगाडिको कोणसभामा धारणा राख्दै धाडेवाले आफूहरुलाई कुनै हालतमा पनि प्रतिवेदन अनुसारको स्थानीय निकाय मान्य नहुने बताउनु भएको छ ।
आयोगको प्रतिवेदनका आधारमा मधेस र मधेसी जनताको भावना विपरित गरिने स्थानीय निकायको निर्वाचन आफूहरुले बिथोल्ने सद्भावना पार्टीका मोरंग अध्यक्ष राधे कामतले बताउनुभयो । सो कोणसभामा संघीय समाजवादी फोरमका मोरंग अध्यक्ष राजकुमार यादव, तमलोपा मोरंगका अध्यक्ष मोहमद कादिर लगायतले आफ्नो विचार राख्नु भएको थियो ।
Post a Comment