प्रस्तावित न्यायाधीशद्वय तेजबहादुर केसी र पुरुषोत्तम भण्डारीविरुद्ध समितिमा तीनवटा उजुरी परेका हुन् । समिति सचिवालयले पुस २१ गतेबाट दस दिनको समय दिएर सर्वसाधारण समेतलाई उजुरी दिन समय दिएको थियो । संसदीय सुनुवाई विशेष समितिका सचिव ध्रुवप्रसाद घिमिरेले दुई न्यायाधीशविरुद्ध तीनवटा उजुरी प्राप्त भएको बताउनुभयो । घिमिरेले दुई जनाविरुद्ध तीनवटा उजुरी प्राप्त भएका छन् । कार्यविधि अनुसार समितिमा सार्वजनिक गरेपछि मात्र कोविरुद्ध कुन उजुरी भन्ने थाहा हुनेछ भन्नुभयो ।
पुस १९ गते न्याय परिषद्ले सुनुवाई प्रक्रिया अगाडि बढाउन समितिलाई पत्राचार गरेको थियो । प्राप्त उजुरी अब समितिमा पेस हुनेछन् । समितिले उजुरीमा थप अनुसन्धान आवश्यक परेमा उजुरीकर्ता र अन्य सरोकारवालासँग छलफल गर्न सक्नेछ । न्याय परिषद्को पुस १८ गतेको बैठकले सर्वोच्चमा रिक्त दुई न्यायाधीशका लागि उच्च अदालतका दुई मुख्य न्यायाधीशको नाम सिफारिस गरेको थियो । परिषद्ले उच्च अदालत विराटनगरका मुख्य न्यायाधीश तेजबहादुर केसी र पोखराका मुख्य न्यायाधीश पुरुषोत्तम भण्डारीलाई सर्वोच्चको न्यायाधीशमा सिफारिस गरेको हो ।
Post a Comment