चिसोका कारण विराटनगरको जनजीवन कष्टकर

विराटनगर, मंसिर २८ गते । विगत केही दिनदेखि एक्कासि बढेको चिसोका कारण यहाँको जनजीवन कष्टकर बनेको छ ।
शीतलहरसँगै चिसो बढेपछि विराटनगरलगायतका बजारहरुमा चहलपहल निकै घटेको छ । कुहिरोसँगै चल्ने चिसो हावाले घरबाहिर निस्कनसमेत समस्या हुने गरेको कटहरी १ का सुवास खतिवडाले बताउनुभयो ।
अत्यधिक चिसोका कारण अस्पतालहरुमा चिसोका विरामीको चाप बढेको छ । अस्पतालमा चिसोका कारण  बालबालिका र बृद्ध, वृद्धालाई असर गरेको कोशी अञ्चल अस्पतालका चिकित्सकले बताएका छन् । खासगरी अस्पतालमा बालबालिका, वृद्धवद्धामा लाग्ने निमोनिया, खोकी, घाँटी दुख्नेजस्ता रोगका बिरामी अस्पतालमा देखापर्न थालेको बताइएको छ ।
यस्तै, बालबालिकामा निमोनिया, ज्वरो, घाँटी दुख्ने, घाँटीमा टन्सिल देखापर्नेजस्ता बिरामी अहिले अस्पतालमा उपचारका लागि आउने गरेको अस्पतालले जनाएको छ । त्यस्तै अस्पतालसहित विभिन्न स्वास्थ्य संस्थामा पनि दम, खोकी, निमोनिया लगायतका बिरामीको चाप बढेको चिकित्सकले बताएका छन् । एक्कासि अत्यधिक चिसो बढेपछि जिल्लामा रहेका विभिन्न सरकारी कार्यालयमा सेवाग्राहीको उपस्थितिसमेत न्यून देखिएको छ ।