संविधान जारी भएको एक वर्ष पूरा, मोरंगमा संविधान दिवस फिका, कांग्रेसको अनुस्थिति, मधेसी मोर्चाको सशक्त विरोध प्रदर्शन

बिराटनगर, असोज, ३ गते।  नयाँ संविधान जारी भएको आज एक वर्ष पुगेको छ । यो अवसरमा मोरङमा जुन भव्यताका साथ दिवस मनाइनु पर्ने थियो तर त्यसको ठिक विपरीत भएको छ । राजनीतिकको उर्वरभूमि मानिएको विराटनगरमा सोमबार गरिएको कार्यक्रम फिका मात्र थिएन लाजमर्दो अवस्था देखिएको थियो । जिल्ला विकास समितिको संयोजनमा जिविस सभाहलमा गरिएको कार्यक्रममा मोरङबाट संसदमा प्रतिनिधित्व गर्ने कोही पनि सांसद सहभागी भएनन् । जिल्लामा रहेका सांसदले समेत यो कार्यक्रमलाई खासै महत्व दिएनन् । सभाहलमा सहभागीका रुपमा प्रमुख जिल्ला अधिकारी तोयम राया, स्थानीय विकास अधिकारी नारायणप्रसाद मैनाली, नेपाल पत्रकार महासंघ मोरङका अध्यक्ष महेन्द्र विष्ट, एमाले जिल्ला अध्यक्ष महेश रेग्मी, माओवादी केन्द्रका सहइन्चार्ज गणेश उप्रेती, महेन्द्र मोरङ क्याम्पसका क्याम्पस प्रमुख महेन्द्रनारायण यादवले सम्बोधन गरे तर त्यो कार्यक्रममा काँग्रेसका कोही पनि नेता सहभागी भएनन् । कार्यक्रममा सुरक्षाकर्मी,सरकारी कर्मचारी र विद्यार्थीकै उपस्थितिमात्रै थियो । कार्यक्रमभन्दा अघि निकालिएको रयालीमा पनि नेता सहभागी थिएनन् । सहभागीले मुखामुख गर्दै नेताहरु आउने आस गरेका थिए तर उनीहरु आएनन् । सांसद कता हराए पत्तै भएन् । विराटनगरमा उपलब्ध सांसदहरुले पनि जिविससम्म पुग्ने पाउकष्ट गरेनन् । कार्यक्रममा बोल्ने वक्ताले संविधान सबैको बन्नु पर्नेमा जोड दिएका थिए । मोरङबाट काँग्रेस, एमाले, माओवादी केन्द्र, फोरम लोकतान्त्रिक लगायतका २६ जना सांसद छन् ।

 

आजकै दिन मधेस र मधेसी विरोधी संविधान जारी भएकोले कालो दिन भन्दै विराटनगरमा संयुक्त लोकतान्त्रिक मधेसी मोर्चाले कालो झण्डासहित विरोध प्रदर्शन गरेका छन् । संघीय गठबन्धनले संविधानको विरोधमा असोज ३ लाई कालो दिवसको रुपमा मनाएको छ । विराटनगरमा पनि मधेश सम्बद्ध दलले विरोध जुलुस निकालेका छन् । महावीर चौकबाट सुरु भएको जुलुसले नगर परिक्रमा गरेको छ । 

बिजुली अफिस हुँदै विराटनगर उपमहानगरपालिकामा कालोझन्डा राख्दै जुलुस वीरेन्द्र सभागृहबाट विराटनगर बजारहुँदै रोडशेषमा पुगेर कोणसभा गरेको छ । कोणसभालाई सद्भावना पार्टीका केन्द्रिय सदस्य दिलीप धाडेवा, संघीय समाजवादी फोरमका जिल्ला अध्यक्ष राजकुमार यादव, सद्भावना पार्टीका अध्यक्ष चन्द्रप्रसाद राजवंशी, तमलोपाका मोरंग अध्यक्ष मोहमद कादिर लगायतले सम्बोधन गर्नुभएको थियो । वक्ताहरुले संविधान संशोधन नगरी मधेश आन्दोलनलाई सम्बोधन नगरेसम्म आन्दोलन जारी रहने बताउनु भएको थियो । आजको विरोधलाई मध्यनजर गर्दै मोरंग प्रशासनले सुरक्षा व्यवस्थालाई कडा बनाएको थियो । 

उता, नेपालको संबिधान जारी भएको दिनको रुपमा नेपाल सरकारले गरेको संबिधान दिबशलाई पुर्बमा संबिधान दिबशलाई मञ्च सम्बद्ध संघिय लिम्बुवान मञ्चले कालो दिनको रुपमा मनाएको छ । अन्तरिम संबिधानको भाबना र लिम्बुवान थारुहट मधेश आदिबासी जनजाती आनदोलनहरुसँग भएको सम्झौताहरलाई कुल्चेर तिन दलले जबरजस्ती संबिधान जारी गरी उत्सब मनाएकोमा यो दिबशलाई बिभीन्न कार्यक्रम गरी कालो दिबशको रुपमा लिम्बुवान मञ्चले मनाएको हो । मञ्चले पुर्बको नौ जिल्लामा कालो झण्डा गाड्ने संबिधानको बिरोध सभा र साँझमा बात्ति निभाएर लगायतका कार्यक्रम गरी बिरोध जनाएको मञ्च सम्बद्ध संघिय लिम्बुवान मञ्च तेह्रथुमका अध्यक्ष देबनारायण सम्बाहाम्फे बताउनु भयो । पुर्बी लिम्बुवान लगायत मञ्च सम्बद्ध सम्पुर्ण राज्य मञ्चहरुले नेपाल ब्यापी आजको दिनलाई कालो दिबशको रुपमा मनाएका छन ।