रामचन्द्र पौडेललाई संस्थापन पक्षबाट सभापतिको उम्मेद्वार बनाउन गृहकार्य शुरु

फागुन १४, काठमाडौं ।

नेपाली कंग्रेसका कार्यवाहक सभापति रामचन्द्र पौडेललाई आगामी महाधिवेशनमा संस्थापन पक्षबाट सभापतिको उम्मेदवार बनाउने गृहकार्यमा उक्त पक्षका नेताहरु व्यस्त भएका छन् ।

पौडेललाई सभापति र सशांक कोइरालालाई महामन्त्रीमा उठाउने विकल्पसहित नेताहरुवीच छलफल तीव्र भएको हो ।

कंग्रेस नेता रामशरण महतको निवासमा बसेको बैठकमा संस्थापन पक्षबाट उम्मेदवार टुङगो लगाउने विकल्पमा छलफल भएको स्रोतको भनाइ छ । पार्टीको नीति तथा कार्यक्रम र महामन्त्रीद्धय प्रकाशमान सिंह र कृष्ण सिटौलाको प्रतिवेदन टुङ्गो लगाउन बाँकी रहेकाले उम्मेदवारीबारे अन्तिम टुङगो नलागेको बताइएको छ ।

सभापतिमा उम्मेदवारी दिने बताइरहेका सिंह र सिटौलालाई मनाउने प्रयास भइरहेको स्रोतको भनाइ छ ।

पौडेललाई सभापतिको उम्मेदवार बनाउने बिषयमा छलफल भइरहेको नेता शेखर कोइरालाले जानकारी दिनुभयो । पौडेललाई उम्मेदवार बनाउनु स्वभाविक प्रक्रिया भएको कोइरालाको भनाइ छ ।

स्रोतका अनुसार नेतृ सुजाता कोइराला समेत आफ्नो टीमसहितको उम्मेदवारी दिने तयारीमा जुट्नुभएको छ । उहाँ नेता महतको निवासमा भएको छलफलमा समेत सहभागी हुनुभएको थिएन ।